جدي ۶: د روانې غميزې دويمه پيلامه
پر افغانستان د شوروي یرغل ۴۱ مه کلیزه - ځانګړی خپرونه
Saturday, December 26, 2020

سباوون يوه خپلواکه ټولنيزه، کلتوري او سياسي خپرونه ده چې د لومړي ځل لپاره د مجلې په بڼه کې د ۱۹۹۳ زيږديز کال د اکټوبر په ۲۱ نيټه د کاليفورنيا ايالت د فونټن ويلې پهٔ ښار کې لهٔ چاپ څخه راووتله او پهٔ پښتو او انګريزي ژبو يې خپرونې پيل کړي.

د سباوون مجلې موخه د لومړۍ ورځې څخه د هيواد د ملي مسايلو پۀ هکله ګټور معلومات خپرول، د هيواد د دښمنانو لهٔ مخونو څخه نقابونه ليرې کول، يوې ملي روحيې ته وده ورکول، او د پښتو ژبې، کلتور او پښتونوالې پۀ هکله علمي او تحقيقي ليکنې خپرول وو. سباوون مجلې د خپلې چاپې بڼې پهٔ موده کې د افغانستان پهٔ ټولنيزو، کلتوري او سياسي برخو کې بيلابيلې خپرونې وکړې او د هيواد ملې، تاريخي، ادبي او سياسي څيرې يې يو پر بل پسې هيوادوالو ته وروپيژندلې. څه موده وروسته سباوون مجله د چاپي بڼې ترڅنګ د انټرنټ(internet) پرمخ هم راوځليده.

سباوون مجله د خپل اوه کلن مطبوعاتي منزل پۀ ترڅ کې د ډيرو کنډوکپرو څخه تيره شوه، د بيلابيلو تهديدونو او مشکلاتو لهٔ پړاو څخه ووتله او رښتينې د هيواد او ولس پۀ هکله ګټور او غوره معلومات يې هيوادوالو او نړيوالو ته وړاندې کړل. د اوو کلونو مطبوعاتي سفر څخه وروسته لهٔ بده مرغه د ځينو مالي ستونزو لهٔ کبله د سباوون مجله د کاغذ پرمخ د چاپ څخه بنده شوه، مګر سباوون خپل مطبوعاتي فعاليت د کمپيوټر د پاڼې (Internet) له لارې مخ پۀ وړاندې بوت.

د سباوون د صحيح، ګټور او اغيزمن کار نتيجه وه چې د سپتمبر د يوولسمې د ناورين څخه وروسته د افغانستان پۀ هکله د موثقو او بيطرفه معلوماتو د راغونډولو پۀ خاطر د سباوون مجلې کمپيوټري پاڼه د نړۍ پۀ بيلابيلو هيوادونو کې په لومړيو مياشتو کې د يولک ديرش زرو (١٣٠٠٠٠) لوستونکو لخوا لوستل کيده چې دا شميره څه موده وروسته پنځو لکو (۵۰۰۰۰۰) ته ورسيده. همداراز د امريکا دولتي مقاماتو هم پۀ عين وخت کې فيصله کړې وه چې د سباوون کمپيوټري پاڼې ته مراجعه وکړي او دا پاڼه د امريکا د جمهورريس، مشرانو جرګې، ولسي جرګې او نورو دولتي منابعو ته د مؤخذ په توګه وروپيژني او د صحيح معلوماتو دپاره ترې ګټه واخلي، چې د سباوون مجلې او کمپيوټري پاڼې مسئولينوته دکانګرس کتابتون (Library of Congress) د دې فيصلې خبر د بريښناليک (email) د لارې ورکړی و.

د سپتمبر د يوولسمې نيټې څخه وروسته اکثره هغه مطبوعات او کسان چې د امريکا د بهرني سياست او نړيوال دريځ په هکله يې انتقادي دريځ درلود غلي کښيناستل او پۀ افغانستان کې د امريکا د سياست پۀ هکله پټه خوله پاتې شول، مګر د سباوون مجلې مسوولينو د هيواد او ولس په مقابل کې خپل مسووليت له ياد نه ونۀ ويست او پدې هکله يې هراړخيزه خپرونې وکړې او پهٔ افغانستان د یرِغل او پهٔ افغانستان کې يې روان غيرعادلانه او ناانډوله سياست ته يې د انتقاد ګوته ونيوله. د افغانانو او نړيوالو پاملرنه يې هغو کورنيو، سيمه ايزو او نړيوالو لاسوهنو او مشکلاتو ته راوګرځولـه چې دا هيواد د هغې له کبله د کلونو راهيسې پۀ اور کې سوزيده.

ملي اهدافو ته د رسيدو، افغانان او نړيوال د افغانستان د اوسني او راتلوکي سياسي واقيعتونو پۀ هکله د روښانولو او د افغانانو د حقه حقوقو د لاسته راوړلو پۀ خاطر، موږ اوس هم د ژبې، ادب، کلتور، دين، د هيواد دبيا ودانولو، ټولنې ته د ودې ورکولو، د ملي حکومت جوړولو، د يو رښتيني او ګټور اساسي قانون په هکله د معلومات راټولولو، د يوې رښتينې نماينده جرګې د راغونډيدلو د پروسې د څيړنې او د اراز نورو ملي او ولسي مسايلو پۀ هکله د هراړخيزه ګټورمعلوماتو د راغونډلو هڅې جاري ساتو.

نن چې يو ځل بيا پۀ هيواد کې داسې حالات راغلي چې بايد د افغانستان د رښتينو ملي مسايلو پۀ هکله ولس ته هراړخيزه معلومات وړاندې شي، پۀ هيواد کې سياسي، ژبني او نظامي ناانډوليو ته د هيوادوالو او نړيوالو پاملرنه راوګرځول شي، ولس د کورني او نړيوال سياسي ميدان د لوبغاړو د لوبو نه خبرکړای شي، اړينه ده چې د فعاليت لمن پراخه شي. مونږ دښمنان ډير لرو او دوستان لږ، خو ملي اهدافو ته د رسيدو، افغانان او نړيوال د افغانستان د اوسني او راتلوکي سياسي واقيعتونو پۀ هکله د روښانولو او د افغانانو د حقه حقوقو د لاسته راوړلو پۀ خاطر به موږ خپلې هڅې جاري ساتو.

تاسې ټولو هيوادوالو ته بلنه درکوو چې موږ سره د Zoom لۀ لارې پۀ خپرونه کې برخه واخلئ او د سباوون د فيسبوک له لارې يې پۀ ژوندۍ بڼه وګور